«Monako» ustozi Sebastyen Pokonyoli Pol Pogba yakshanba kuni oqshomda bo‘lib o‘tadigan «Marsel»ga qarshi o‘yinda maydonga qaytishi mumkinligiga shama qildi.
Hozircha Pogbaning joriy mavsumdagi hisobida atigi o‘ttiz daqiqalik o‘yin amaliyoti mavjud. Biroq yaqinda uning jarohatidan qutilgani va o‘ynashga tayyorligi haqida xabarlar paydo bo‘ldi. Monegasklar murabbiyi ham buni tasdiqladi.
«Oldinda yana bir nechta mashg‘ulotlar bor, lekin u anchadan beri guruh bilan birga shug‘ullanmoqda va o‘sishga erishyapti. Pol o‘yinda ishtirok etishini inkor etmayman», — deya mutaxassisning so‘zlarini keltiradi derbyderbyderby.it nashri.
Eslatib o‘tamiz, Pogba uzoq muddatli diskvalifikasiyani o‘tab bo‘lgach, «Monako» safiga kelib qo‘shilgan edi. U avval Italiya va Angliya chempionatlarida to‘p surgan.
