«Liverpul» klubining hujumkor yarim himoyachisi Dominik Soboslai jamoani tark etishi mumkinligi haqidagi xabarlarga munosabat bildirdi.

«Menga bu yer juda yoqadi. Oilam baxtli, men klubni va muxlislarni yaxshi ko‘raman. Ushbu klub sharafini himoya qilish menga katta zavq bag‘ishlaydi. Tamom», — deya Soboslaining so‘zlarini jurnalist Pol Gorst keltirmoqda.

Joriy mavsumda Soboslai barcha turnirlarda 43 ta uchrashuvda maydonga tushib, raqiblar darvozasini 12 bor ishg‘ol qildi va o‘z hisobiga 8 ta golli uzatmani yozdirib qo‘ydi.

25 yoshli Soboslaining «Liverpul» bilan amaldagi shartnomasi 2028 yilgacha mo‘ljallangan. Transfermarkt ekspertlari yarim himoyachining qiymatini 100 million yevroga baholashmoqda.

Avvalroq, vengriyalik futbolchiga Madridning «Real» klubi qiziqish bildirayotgani haqida xabarlar tarqalgan edi.