Londonning «Arsenal» klubi yarim himoyachisi Kristian Nyorgor Angliya Kubogi doirasida «Sautgempton»dan qabul qilingan mag‘lubiyatdan (1:2) so‘ng jurnalistlar bilan suhbatlashdi.

«Avliyolar» 85-daqiqada hal qiluvchi golni urib, «kanonirlar»ni «trebl» (bir mavsumda uchta yirik sovrin) qayd etish umididan mahrum qilishdi.

«Ba’zi vaziyatlarda o‘yin haddan tashqari xaotik ko‘rinish oldi. «Sautgempton» hujumga juda tez o‘tdi — biz har doim ham ularga yetib olishga ulgurmadik. Ikkinchi bo‘limda o‘z o‘yinimizni topib, hisobni tenglashtirgan edik, biroq ahmoqona gol o‘tkazib yubordik. Juda xafamiz, lekin seshanba kuni bizni yana bir muhim bahs kutmoqda. Ayrim daqiqalarda o‘yinni nazorat qilayotgandek edik, ammo shunday paytlar bo‘ldiki, raqib bizni butunlay mag‘lub etdi. Umuman olganda, mening fikrimcha, biz yetarlicha yaxshi o‘ynay olmadik», — deya Norgorning so‘zlarini keltiradi BBC.

7 aprel kuni «Arsenal» Chempionlar ligasi chorak finali doirasida safarda «Sporting»ga qarshi maydonga tushadi.