Лондоннинг «Арсенал» клуби ярим ҳимоячиси Кристиан Нёргор Англия Кубоги доирасида «Саутгемптон»дан қабул қилинган мағлубиятдан (1:2) сўнг журналистлар билан суҳбатлашди.

«Авлиёлар» 85-дақиқада ҳал қилувчи голни уриб, «канонирлар»ни «требл» (бир мавсумда учта йирик соврин) қайд этиш умидидан маҳрум қилишди.

«Баъзи вазиятларда ўйин ҳаддан ташқари хаотик кўриниш олди. «Саутгемптон» ҳужумга жуда тез ўтди — биз ҳар доим ҳам уларга етиб олишга улгурмадик. Иккинчи бўлимда ўз ўйинимизни топиб, ҳисобни тенглаштирган эдик, бироқ аҳмоқона гол ўтказиб юбордик. Жуда хафамиз, лекин сешанба куни бизни яна бир муҳим баҳс кутмоқда. Айрим дақиқаларда ўйинни назорат қилаётгандек эдик, аммо шундай пайтлар бўлдики, рақиб бизни бутунлай мағлуб этди. Умуман олганда, менинг фикримча, биз етарлича яхши ўйнай олмадик», — дея Норгорнинг сўзларини келтиради BBC.

7 апрель куни «Арсенал» Чемпионлар лигаси чорак финали доирасида сафарда «Спортинг»га қарши майдонга тушади.