Kiprda o‘tkazilayotgan shaxmat bo‘yicha 2026 yilgi Nomzodlar turniri o‘zbekistonlik grossmeyster Javohir Sindarov uchun muvaffaqiyatli davom etmoqda. Musobaqaning 9-turida Sindarov germaniyalik Matias Blubaum bilan bahs olib bordi.

Germaniyalik shaxmatchi, kutilmaganda, o‘z odatiga xilof ravishda, hujumkor o‘yin namoyish etdi. Buning oqibatida u kichik xatolarga yo‘l qo‘ya boshladi. Sindarov esa to‘g‘ri himoyalanib, qarshi hujumga o‘tdi. 25-yurishga kelib kompyuter Javohirning g‘alaba qozonish imkoniyatini 4 ballga baholadi (ya’ni bitta sipoh ustunligini qayd etdi). Ammo, aynan 25-yurishda Sindarov Farzin b7 yurishini ko‘rmay qoldi. Oqibatda farzinlar va ba’zi yengil sipohlar almashib ketdi va vaziyat durangga aylanib qoldi.

Har ikki shaxmatchi 59-yurishdan so‘ng durangga rozi bo‘ldi. Ushbu natija evaziga Javohir 7 ochko bilan turnir jadvalidagi peshqadamligini saqlab qoldi.

Musobaqada 4,5 ochko bilan 2 va 3-o‘rinni egallab turgan Fabiano Karuana va Anish Giri o‘rtasidagi o‘yinda, kutilmaganda, niderlandiyalik shaxmatchining qo‘li baland keldi. Natija Giri 5,5 ochko to‘plagan holda Sindarov bilan oradagi farqni 1,5 ochkoga qisqartirdi.

Eslatib o‘tamiz, 15 aprelga qadar davom etadigan ushbu turnir g‘olibi amaldagi Jahon chempioni, hindistonlik Gukesh Dommarajuga qarshi shaxmat toji uchun kechadigan bahsda ishtirok etish huquqini qo‘lga kiritadi. 700 ming AQSH dollari miqdoridagi sovrin jamg‘armasiga ega musobaqa ikki davradan (14 ta tur) iborat.