Ispaniya futboli yulduzlari kutilmaganda yirik iqtisodiy jinoyat ishtirokchisiga aylanib qoldi. Andorra sud organlari Ispaniya La Ligasining bir qator taniqli futbolchilariga nisbatan qimmatbaho soatlar kontrabandasi bo‘yicha jinoiy ish ochdi. Bu haqda El Mundo nashri xabar bermoqda.

Tergov harakatlari Andorra knyazligida ro‘yxatdan o‘tgan Best In Asociados shirkatiga qarshi qaratilgan. Ushbu kompaniya dunyoga mashhur brendlarning qimmatbaho soatlarini Ispaniya hududida majburiy soliqlarni to‘lamasdan sotish bilan shug‘ullangan. Kompaniya futbolchilarga soatlarni juda katta chegirmalar bilan taklif qilgan, biroq bu arzon narxlar davlat xazinasiga to‘lanishi kerak bo‘lgan bojxona va soliq to‘lovlarini chetlab o‘tish evaziga yuzaga kelgan.

Soat savdosi Madrid va Ispaniyaning boshqa yirik shaharlarida amalga oshirilgan. Kompaniyaning “maxsus” mijozlari ro‘yxatida quyidagi mashhur futbolchilar aniqlangan:

Dani Karvaxal (“Real Madrid”);
Sezar Aspilikueta (“Sevilya”);
Santi Kasorla (“Real Ovedo”);
David Silva (sobiq futbolchi).

Ma’lum qilinishicha, futbolchilar narxi o‘n minglab yevro turadigan Rolex va Patek Philippe kabi brendlarning lyuks modellarini sotib olishgan. Ispaniya Fuqaro gvardiyasi so‘nggi haftalarda ushbu xaridlar bo‘yicha futbolchilardan ma’lumot talab qila boshladi.

Andorra sudyasi mazkur ish bo‘yicha barcha ishtirokchilardan rasmiy ko‘rsatma olishni rejalashtirgan. Eng e’tiborli jihati shundaki, huquq-tartibot idoralari futbolchilarni shunchaki guvoh emas, balki gumonlanuvchi maqomida so‘roq qilishmoqchi. Bu ularning ushbu noqonuniy sxemadan xabardor bo‘lgan-bo‘lmaganini aniqlash imkonini beradi.

Eslatib o‘tamiz, Ispaniya qonunchiligiga ko‘ra, qimmatbaho buyumlar savdosida soliqlardan bo‘yin tovlash og‘ir iqtisodiy jinoyat hisoblanadi va bu futbolchilarning obro‘siga jiddiy putur yetkazishi mumkin.