Испания футболи юлдузлари кутилмаганда йирик иқтисодий жиноят иштирокчисига айланиб қолди. Андорра суд органлари Испания Ла Лигасининг бир қатор таниқли футболчиларига нисбатан қимматбаҳо соатлар контрабандаси бўйича жиноий иш очди. Бу ҳақда El Mundo нашри хабар бермоқда.

Тергов ҳаракатлари Андорра князлигида рўйхатдан ўтган Best In Asociados ширкатига қарши қаратилган. Ушбу компания дунёга машҳур брендларнинг қимматбаҳо соатларини Испания ҳудудида мажбурий солиқларни тўламасдан сотиш билан шуғулланган. Компания футболчиларга соатларни жуда катта чегирмалар билан таклиф қилган, бироқ бу арзон нархлар давлат хазинасига тўланиши керак бўлган божхона ва солиқ тўловларини четлаб ўтиш эвазига юзага келган.

Соат савдоси Мадрид ва Испаниянинг бошқа йирик шаҳарларида амалга оширилган. Компаниянинг “махсус” мижозлари рўйхатида қуйидаги машҳур футболчилар аниқланган:

Дани Карвахаль (“Реал Мадрид”);
Сезар Аспиликуэта (“Севилья”);
Санти Касорла (“Реал Оведо”);
Давид Сильва (собиқ футболчи).

Маълум қилинишича, футболчилар нархи ўн минглаб евро турадиган Rolex ва Patek Philippe каби брендларнинг люкс моделларини сотиб олишган. Испания Фуқаро гвардияси сўнгги ҳафталарда ушбу харидлар бўйича футболчилардан маълумот талаб қила бошлади.

Андорра судьяси мазкур иш бўйича барча иштирокчилардан расмий кўрсатма олишни режалаштирган. Энг эътиборли жиҳати шундаки, ҳуқуқ-тартибот идоралари футболчиларни шунчаки гувоҳ эмас, балки гумонланувчи мақомида сўроқ қилишмоқчи. Бу уларнинг ушбу ноқонуний схемадан хабардор бўлган-бўлмаганини аниқлаш имконини беради.

Эслатиб ўтамиз, Испания қонунчилигига кўра, қимматбаҳо буюмлар савдосида солиқлардан бўйин товлаш оғир иқтисодий жиноят ҳисобланади ва бу футболчиларнинг обрўсига жиддий путур етказиши мумкин.