«Kristal Pelas» bosh murabbiyi Oliver Glasner Konferensiya Ligasi chorak finalining ilk bahsida Italiyaning «Fiorentina» jamoasi ustidan qozonilgan yirik g‘alaba (3:0) haqida o‘z fikrlarini bildirdi.

«Menga birinchi bo‘lim va o‘yinning so‘nggi 20-25 daqiqasidagi harakatlarimiz ma’qul keldi: qanday kuch bilan oldinga o‘tganimiz, agressiv hujum qilganimiz va darvozaga intilganimiz, shu bilan birga muvozanatni saqlaganimiz.

Ikkinchi bo‘limda «Fiorentina» faollashgan paytlar bo‘ldi, ammo almashtirishlar o‘yin taqdirini hal qildi deb o‘ylayman. Yakunda biz to‘rtinchi golni urishga ular birinchi golini urishidan ko‘ra yaqinroq edik. Bu faqat birinchi qadam, ikkinchisini bir haftadan keyin qo‘yamiz», — dedi Glasner UYEFA rasmiy saytiga.

Glasner, shuningdek, jamoa oldida APL doirasida «Nyukasl»ga qarshi muhim o‘yin turganini va har ikki turnirda ham yuqori natija qayd etish niyatida ekanliklarini ta’kidlab o‘tdi.