«Real» hujumchisi Kilian Mbappe «Jirona»ga qarshi kechgan bahs yakunida penalti ishlay olmadi.

La Liganing 31-turi doirasidagi uchrashuv 1:1 hisobidagi durang bilan yakunlandi.

O‘yinning 88-daqiqasida Mbappe darvozabon maydonchasi tomon harakatlanayotganda «Jirona» himoyachisi Vitor Reys bilan to‘qnashib ketdi va maydonga yiqildi. Oyoqlardagi kontaktdan tashqari, Reys Mbappening yuziga qo‘li bilan ham tegib ketgan edi.

«Madrid» futbolchilari penalti belgilanishini so‘rashdi, biroq bosh hakam Xavyer Alberola Roxas ushbu vaziyatda qoida buzilishini ko‘rmadi.

Bungacha, ikkinchi bo‘lim davomida ham Mbappe Aleks Moreno bilan to‘qnashuvdan so‘ng jarima maydonchasi ichida yiqilgan edi. O‘shanda ham hakam vaziyatga e’tibor bermagan, «Jirona» futbolchilari esa fransiyalik hujumchini simulyasiya uchun jazolashni talab qilishgandi.