«Реал» ҳужумчиси Килиан Мбаппе «Жирона»га қарши кечган баҳс якунида пенальти ишлай олмади.
Ла Лиганинг 31-тури доирасидаги учрашув 1:1 ҳисобидаги дуранг билан якунланди.
Ўйиннинг 88-дақиқасида Мбаппе дарвозабон майдончаси томон ҳаракатланаётганда «Жирона» ҳимоячиси Витор Рейс билан тўқнашиб кетди ва майдонга йиқилди. Оёқлардаги контактдан ташқари, Рейс Мбаппенинг юзига қўли билан ҳам тегиб кетган эди.
«Мадрид» футболчилари пенальти белгиланишини сўрашди, бироқ бош ҳакам Хавьер Альберола Рохас ушбу вазиятда қоида бузилишини кўрмади.
Бунгача, иккинчи бўлим давомида ҳам Мбаппе Алекс Морено билан тўқнашувдан сўнг жарима майдончаси ичида йиқилган эди. Ўшанда ҳам ҳакам вазиятга эътибор бермаган, «Жирона» футболчилари эса франциялик ҳужумчини симуляция учун жазолашни талаб қилишганди.
