Myunxenning "Bavariya" jamoasi bosh murabbiyi Vensan Kompani UYEFA Chempionlar ligasi chorak finali doirasida Madridning "Real" klubiga qarshi bo‘lib o‘tadigan javob uchrashuvi haqida o‘z fikrlarini bildirdi.
"O‘ylashimcha, biz tarkibga bitta yoki ikkita o‘zgartirish kiritishimiz mumkin. Hozirda jamoada kuchli raqobat mavjud. Bu nima ekanini juda yaxshi bilaman, chunki faoliyatim davomida raqobatga ko‘p duch kelganman. Javob bahsi uchun asosiy tarkib bo‘yicha hali yakuniy qarorga kelganim yo‘q", — deya belgiyalik mutaxassisning so‘zlarini keltiradi ESPN.
Dastlabki uchrashuvda "Bavariya" safarda "qaymoqranglilar" ustidan 2:1 hisobida g‘alaba qozongan edi. Ushbu qarama-qarshilikning javob o‘yini 15 aprel kuni Myunxenda bo‘lib o‘tadi. Uchrashuv Toshkent vaqti bilan soat 00:00 da boshlanadi.













