Madridning “Real” klubi hujumchisi Kilian Mbappe La Liganing 31-turidan o‘rin olgan “Jirona”ga qarshi o‘yinda (1:1) olgan jarohati (qoshi yorilishi) sababli jamoaning mashg‘ulotlarida ishtirok etmadi. Bu haqda Mundo Deportivo nashri xabar berdi.
Fransiyalik forvard “Jirona” bilan bahsning 88-daqiqasida, raqib jarima maydonchasi ichida Vitor Reysning bergan zarbasidan so‘ng jarohat olgan edi. O‘shanda uchrashuv bosh hakami Xavyer Alberola Roxas qoida buzilishini qayd etmadi va “qaymoqranglilar” foydasiga 11 metrlik jarima zarbasi belgilanmadi.
Eslatib o‘tamiz, 15 aprel kuni “Real” Chempionlar Ligasi chorak finalining javob uchrashuvi doirasida “Bavariya” bilan to‘qnash keladi. Dastlabki o‘yinda madridliklar 1:2 hisobida imkoniyatni boy bergan edi. Hozirda Mbappening ushbu muhim bahsda ishtirok etishi so‘roq ostida turibdi.
Avvalroq, “qirollik klubi” o‘zining sobiq yulduzi Toni Kroosni klub kelajagida asosiy rol o‘ynashi uchun jamoaga qaytarishni rejalashtirayotgani xabar qilingan edi. Klubdagi aksariyat mutaxassislar uning qaytishi jamoada katta o‘zgarishga sabab bo‘lishiga ishonmoqda.
