Мадриднинг “Реал” клуби ҳужумчиси Килиан Мбаппе Ла Лиганинг 31-туридан ўрин олган “Жирона”га қарши ўйинда (1:1) олган жароҳати (қоши ёрилиши) сабабли жамоанинг машғулотларида иштирок этмади. Бу ҳақда Mundo Deportivo нашри хабар берди.

Франциялик форвард “Жирона” билан баҳснинг 88-дақиқасида, рақиб жарима майдончаси ичида Витор Рейснинг берган зарбасидан сўнг жароҳат олган эди. Ўшанда учрашув бош ҳаками Хавьер Алберола Рохас қоида бузилишини қайд этмади ва “қаймоқранглилар” фойдасига 11 метрлик жарима зарбаси белгиланмади.

Эслатиб ўтамиз, 15 апрель куни “Реал” Чемпионлар Лигаси чорак финалининг жавоб учрашуви доирасида “Бавария” билан тўқнаш келади. Дастлабки ўйинда мадридликлар 1:2 ҳисобида имкониятни бой берган эди. Ҳозирда Мбаппенинг ушбу муҳим баҳсда иштирок этиши сўроқ остида турибди.

Аввалроқ, “қироллик клуби” ўзининг собиқ юлдузи Тони Кроосни клуб келажагида асосий рол ўйнаши учун жамоага қайтаришни режалаштираётгани хабар қилинган эди. Клубдаги аксарият мутахассислар унинг қайтиши жамоада катта ўзгаришга сабаб бўлишига ишонмоқда.