“Барселона” Мадриднинг “Атлетико” клуби ҳужумчиси Хулиан Алварес трансфери бўйича режасини ўзгартирди.

AS нашри хабарига кўра, каталонияликлар спорт директори Декунинг футболчи агенти Фернандо Идалго билан учрашувидан сўнг клуб матбуот орқали босим ўтказишдан воз кечган. Аввалроқ Алварес 2026 йилги Жаҳон чемпионатида журналистлар билан суҳбат чоғида “орзусини амалга ошириш истаги” борлигини айтиб, клубидан уни трансфер қилишни очиқчасига сўраганди. Эндиликда эса томонлар ёпиқ музокараларга ўтмоқда.

Ҳужумчи “Атлетико” билан машғулотларни давом эттиради ва ОАВга ҳеч қандай изоҳ бермайди. Алварес бош мураббий Диего Симеоне ҳамда Мадрид клуби раҳбариятини уни қўйиб юборишга шахсий тарзда ишонтирмоқчи.

Аргентиналик футболчи клуб раҳбарларига аввалроқ берган ваъдасини эслатишни режалаштирмоқда. Унга кўра, “Атлетико”га муносиб таклиф тушса, трансферга розилик берилиши мумкин. Алварес эса фақат “Барселона”га ўтиш вариантини кўриб чиқмоқда.

“Матрасчилар” раҳбарияти ҳамон асосий ҳужумчисини қўйиб юборишга қарши. Музокараларни жойидан силжитиш учун каталонияликлар трансфер бюджетини сезиларли даражада оширишга тайёр:

- “Барселона”нинг дастлабки таклифи 100 миллион евродан кам бўлган;
- Кейинчалик таклиф 100 миллион еврогача оширилган;
- Ҳозирги янгиланган таклиф эса 120 миллион еврога баҳоланмоқда.

Энди Мадрид клуби раҳбарияти “Барселона”га ўтишни расман сўраган қимматбаҳо футболчини жамоада сақлаб қолиш керакми ёки йўқ, деган масалани ҳал қилиши керак.

Эслатиб ўтамиз, Алварес 2024 йилда “Манчестер Сити”дан “Атлетико”га ўтган ва Мадрид клуби билан олти йиллик шартнома имзолаган. Трансфер қиймати 75 миллион еврони ташкил этган, яна 20 миллион евро бонуслар сифатида белгиланган.