«Реал» бош мураббийи Жозе Моуриньо Мадрид клубида янги қоидаларни жорий қилди. Бу ҳақда Diario AS хабар бермоқда.

Манбага кўра, португалиялик мутахассис футболчиларнинг овқатланиш тартибини янада қатъийлаштирди. Нонушта ва тамадди учун белгиланган менюлар жорий этилди. Энди футболчилар овқат танлашда эркин эмас.

Шунингдек, футболчилар машғулот бошланишидан бир соат олдин машғулот базасида бўлишлари шарт. Ҳар қандай кечикиш, футболчининг мақомидан қатъи назар, жазога сабаб бўлади. Кечикканлар учун молиявий жарима қўлланмайди. Унинг ўрнига футболчи якка тартибда ва жамоадан алоҳида ҳолда куч машқларини бажаради.

Бундан ташқари, жароҳат олган футболчиларнинг ҳолати ҳам машғулот базасида назорат қилинади. Жароҳатланган футболчилар эрталаб ва кундузи тикланиш жараёнини машғулот базасида ўтказишлари керак. Улар шахсий мураббийларини сақлаб қолишлари мумкин, аммо уларнинг иши клуб ходимлари билан мувофиқлаштирилиши ва назорат қилиниши лозим.

Шунингдек, жамоавий тушликлар ҳам йўлга қўйилади. Моуриньо футболчилар ва клуб ходимлари машғулот базасида бирга овқатланишларини истамоқда.