«Chelsi» bosh murabbiyi Liam Rosenyor keyingi mavsumda ham klubdagi faoliyatini davom ettirishiga sha’ma qildi.

«Ko‘klar»ning so‘nggi o‘yinlardagi qator muvaffaqiyatsiz natijalaridan so‘ng mutaxassisning kelajagi shubha ostida qolgan edi. Yakshanba kuni londonliklar o‘z maydonida «Manchester Siti»ga imkoniyatni boy berishdi (0:3). Murabbiyning o‘zi esa allaqachon yozgi transferlarni rejalashtirishda ishtirok etayotganini ma’lum qildi.

«Biz yozgi transfer oynasi yopilganidan keyin tarkibimiz qanday ko‘rinishda bo‘lishi kerakligi borasida batafsil muhokamalar o‘tkazdik», — deya jurnalist Fabrisio Romano Rosenyorning so‘zlarini keltirmoqda.

Angliyalik mutaxassis joriy yilning yanvar oyida Enso Mareskaning o‘rnini egallab, «Chelsi»da ish boshlagan edi. Jamoaning amaldagi boshqaruvchisi bilan imzolangan shartnoma 2032 yilgacha mo‘ljallangan.