Deklan Raysning YECHL chorak finali doirasidagi «Sporting»ga qarshi javob o‘yinida ishtirok etishi so‘roq ostida qolmoqda. Sky Sports xabariga ko‘ra, yarim himoyachi «kanonirlar»ning hal qiluvchi bahs oldidan o‘tkazilgan ochiq mashg‘ulotlarida ko‘rinish bermagan.
Bundan tashqari, jamoaning boshqa muhim a’zolari — Yurriyen Timber, Bukayo Saka, Martin Edegor va Rikkardo Kalafyori ham asosiy guruh bilan mashq qilmagan.
Bosh murabbiy Mikel Arteta vaziyatga quyidagicha izoh berdi:
«Deklanning holatini ertaga ertalab yana bir bor tekshirib ko‘rishimiz kerak. U mashg‘ulotlarda qatnasha olmadi, lekin maydonga tushish uchun qo‘lidan kelgan barcha ishni qiladi. Saka va Timberga kelsak, balki ulardan biri ertaga tayyor bo‘lar, ko‘ramiz».
Eslatib o‘tamiz, «Arsenal» birinchi o‘yinda safarda 1:0 hisobida g‘alaba qozongan. Javob uchrashuvi ertaga, 15 aprel kuni Londonda bo‘lib o‘tadi.
