Деклан Райснинг ЕЧЛ чорак финали доирасидаги «Спортинг»га қарши жавоб ўйинида иштирок этиши сўроқ остида қолмоқда. Sky Sports хабарига кўра, ярим ҳимоячи «канонирлар»нинг ҳал қилувчи баҳс олдидан ўтказилган очиқ машғулотларида кўриниш бермаган.

Бундан ташқари, жамоанинг бошқа муҳим аъзолари — Юрриен Тимбер, Букайо Сака, Мартин Эдегор ва Риккардо Калафьори ҳам асосий гуруҳ билан машқ қилмаган.

Бош мураббий Микель Артета вазиятга қуйидагича изоҳ берди:

«Декланнинг ҳолатини эртага эрталаб яна бир бор текшириб кўришимиз керак. У машғулотларда қатнаша олмади, лекин майдонга тушиш учун қўлидан келган барча ишни қилади. Сака ва Тимберга келсак, балки улардан бири эртага тайёр бўлар, кўрамиз».

Эслатиб ўтамиз, «Арсенал» биринчи ўйинда сафарда 1:0 ҳисобида ғалаба қозонган. Жавоб учрашуви эртага, 15 апрель куни Лондонда бўлиб ўтади.