Argentina futbol assosiasiyasi (AFA) VID promouterlik kompaniyasi tomonidan o‘ziga va Lionel Messiga nisbatan bildirilgan barcha ayblovlarni rad etdi.
Eslatib o‘tamiz, VID kompaniyasi AFA ustidan sudga da’vo arizasi bilan murojaat qilgan edi. Da’voning mohiyati shundan iboratki, futbolchi Venesuela terma jamoasiga qarshi o‘rtoqlik uchrashuvida, uning ishtiroki shartnomada ko‘rsatilganiga qaramay, maydonga tushmagan.
«AFA tegishli kelishuvlar bo‘yicha barcha majburiyatlarini to‘liq bajardi, shu jumladan 2025 yil oktyabr oyidagi har ikki o‘yinda ishtirok etish uchun Argentina terma jamoasini taqdim etdi», — deyiladi assosiasiya bayonotida. Ushbu matnni TMZ Sport nashri keltirmoqda.
Tomonlar o‘rtasidagi kelishuvga ko‘ra, Messi Venesuela va Puerto-Rikoga qarshi o‘rtoqlik o‘yinlarining har birida kamida 30 daqiqadan harakat qilishi kerak edi. Ikkinchi uchrashuvni argentinalik yulduz to‘liq o‘tkazgan.
