Аргентина футбол ассоциацияси (AFA) VID промоутерлик компанияси томонидан ўзига ва Лионель Мессига нисбатан билдирилган барча айбловларни рад этди.
Эслатиб ўтамиз, VID компанияси АFА устидан судга даъво аризаси билан мурожаат қилган эди. Даъвонинг моҳияти шундан иборатки, футболчи Венесуэла терма жамоасига қарши ўртоқлик учрашувида, унинг иштироки шартномада кўрсатилганига қарамай, майдонга тушмаган.
«AFA тегишли келишувлар бўйича барча мажбуриятларини тўлиқ бажарди, шу жумладан 2025 йил октябрь ойидаги ҳар икки ўйинда иштирок этиш учун Аргентина терма жамоасини тақдим этди», — дейилади ассоциация баёнотида. Ушбу матнни TMZ Sport нашри келтирмоқда.
Томонлар ўртасидаги келишувга кўра, Месси Венесуэла ва Пуэрто-Рикога қарши ўртоқлик ўйинларининг ҳар бирида камида 30 дақиқадан ҳаракат қилиши керак эди. Иккинчи учрашувни аргентиналик юлдуз тўлиқ ўтказган.
