«Napoli» prezidenti Aurelio de Laurentis jamoa bosh murabbiyi Antonio Konte bilan suhbatlashishni rejalashtirmoqda. Avvalroq, klub rahbarining qaroriga ko‘ra murabbiy iste’foga chiqishi mumkinligi haqida xabarlar tarqalgan edi.
Endilikda Corriere dello Sport nashrining ta’kidlashicha, de Laurentis Konte bilan uchrashuvni kelasi haftada o‘tkazishga qaror qilgan, vaholanki, dastlab bu suhbat mavsum yakunida bo‘lib o‘tishi kerak edi. Muzokaralarda, shuningdek, sport direktori Jovanni Manna va bosh direktor Andrea Kyavelli ham ishtirok etadi.
Yaqinda Aurelio de Laurentis Antonio Kontening Italiya terma jamoasi bosh murabbiyligiga tayinlanishiga to‘sqinlik qilmasligini tan olgan edi. Mutaxassisning amaldagi shartnomasi 2027 yilning yoziga qadar mo‘ljallangan.













