«Manchester Siti» bosh murabbiyi Xosep Gvardiola yarim himoyachi Bernardu Silvaning tez orada klubni tark etishi borasida fikr bildirdi. «Shaharliklar» sardori joriy mavsum yakunlanganidan so‘ng erkin agent sifatida jamoadan ketadi. Yaqinda portugaliyalik futbolchining o‘zi tugayotgan shartnomasi uzaytirilmasligini e’lon qilgan edi.
«Mening bir bo‘lagim Bernardu bilan birga ketadi. "Manchester Siti"ni usiz tasavvur qilish qiyin. U shu to‘qqiz yil davomida maydonda ham, maydon tashqarisida ham juda muhim ahamiyatga ega bo‘ldi. Silva — o‘ziga xos futbolchi va u bizga qolgan o‘yinlarda yordam berishini bilaman. Umid qilamanki, mavsumning so‘nggi oyini muvaffaqiyatli o‘tkazamiz. U eng yaxshisiga loyiq. Biz birgalikda 19 ta sovrin yutdik va yaqin orada yana ikkitasini yutishimiz mumkin. Biz ular tomon intilamiz», — deya Gvardiolaning so‘zlarini City Report keltirmoqda.
