«Манчестер Сити» бош мураббийи Хосеп Гвардиола ярим ҳимоячи Бернарду Силванинг тез орада клубни тарк этиши борасида фикр билдирди. «Шаҳарликлар» сардори жорий мавсум якунланганидан сўнг эркин агент сифатида жамоадан кетади. Яқинда португалиялик футболчининг ўзи тугаётган шартномаси узайтирилмаслигини эълон қилган эди.

«Менинг бир бўлагим Бернарду билан бирга кетади. "Манчестер Сити"ни усиз тасаввур қилиш қийин. У шу тўққиз йил давомида майдонда ҳам, майдон ташқарисида ҳам жуда муҳим аҳамиятга эга бўлди. Силва — ўзига хос футболчи ва у бизга қолган ўйинларда ёрдам беришини биламан. Умид қиламанки, мавсумнинг сўнгги ойини муваффақиятли ўтказамиз. У энг яхшисига лойиқ. Биз биргаликда 19 та соврин ютдик ва яқин орада яна иккитасини ютишимиз мумкин. Биз улар томон интиламиз», — дея Гвардиоланинг сўзларини City Report келтирмоқда.