«Arsenal» bosh murabbiyi Mikel Arteta Pep Gvardiola va «Manchester Siti»ga qarshi o‘tkazilgan 17 ta o‘yinning faqat 4 tasida g‘alaba qozongan.

Bugun «shaharliklar» o‘z maydonida londonliklar ustidan g‘alaba qozonishdi (2:1). Manchester klubi turnir jadvalida ikkinchi o‘rinni egallab turibdi va bitta zaxira o‘yiniga ega bo‘lgan holda, «Arsenal»dan uch ochko ortda qolmoqda.

O‘zaro o‘tkazilgan 17 ta uchrashuvda Gvardiola Arteta ustidan 10 bor zafar quchgan, 4 marta mag‘lub bo‘lgan va yana 3 ta o‘yinda jamoalar durang qayd etishgan.

Qayd etish joizki, Gvardiolaga qarshi 17 ta o‘yin — Arteta faoliyatidagi eng yuqori ko‘rsatkichdir; u «Liverpul»ning sobiq murabbiyi Yurgen Kloppga qarshi 14 bor maydonga tushgan. Shuningdek, 10 ta mag‘lubiyat ham Mikel uchun eng yomon ko‘rsatkich hisoblanadi (u Kloppga 6 marta imkoniyatni boy bergan).

Eslatib o‘tamiz, Arteta «Arsenal»da mustaqil faoliyatini boshlagunga qadar «Manchester Siti»da Gvardiolaning assistenti bo‘lib ishlagan (2016–2019).