«Арсенал» бош мураббийи Микель Артета Пеп Гвардиола ва «Манчестер Сити»га қарши ўтказилган 17 та ўйиннинг фақат 4 тасида ғалаба қозонган.

Бугун «шаҳарликлар» ўз майдонида лондонликлар устидан ғалаба қозонишди (2:1). Манчестер клуби турнир жадвалида иккинчи ўринни эгаллаб турибди ва битта захира ўйинига эга бўлган ҳолда, «Арсенал»дан уч очко ортда қолмоқда.

Ўзаро ўтказилган 17 та учрашувда Гвардиола Артета устидан 10 бор зафар қучган, 4 марта мағлуб бўлган ва яна 3 та ўйинда жамоалар дуранг қайд этишган.

Қайд этиш жоизки, Гвардиолага қарши 17 та ўйин — Артета фаолиятидаги энг юқори кўрсаткичдир; у «Ливерпуль»нинг собиқ мураббийи Юрген Клоппга қарши 14 бор майдонга тушган. Шунингдек, 10 та мағлубият ҳам Микель учун энг ёмон кўрсаткич ҳисобланади (у Клоппга 6 марта имкониятни бой берган).

Эслатиб ўтамиз, Артета «Арсенал»да мустақил фаолиятини бошлагунга қадар «Манчестер Сити»да Гвардиоланинг ассистенти бўлиб ишлаган (2016–2019).