Braziliyaning «Santos» klubi hujumchisi Neymar o‘zining har bir harakati uchun jamoatchilikka izoh berishdan charchaganini ma’lum qildi.

Braziliya A Seriyasining 12-turi doirasida «Santos» o‘z maydonida «Fluminense» jamoasini qabul qilib, 2:3 hisobida imkoniyatni boy berdi. Ushbu mag‘lubiyatdan so‘ng jamoa turnir jadvalida 15-o‘ringa tushib ketdi. Mazkur bahsda 34 yoshli forvard to‘liq harakat qilgan bo‘lsa-da, samarali harakatlari bilan ajralib tura olmadi.

O‘yindan so‘ng futbolchi ijtimoiy tarmoqlardagi sahifasiga video joylashtirdi. Unda Neymar barmoqlari bilan quloqlarini yopib, maydonni tark etayotgani aks etgan. Ushbu holat jamoatchilik va OAV vakillari o‘rtasida turli bahs-munozaralarga sabab bo‘ldi.

«Barselona» va «PSJ» klublarining sobiq a’zosi yuzaga kelgan vaziyatga quyidagicha munosabat bildirdi:

— Nima uchun qulog‘imni qashiganimga ham izoh berishim kerak bo‘lgan kunlar keldi. Sizlar haddingizdan oshib, qizil chiziqni kesib o‘tmoqdasiz. Bunday holatga duch kelish juda ayanchli. Hech bir inson bunday bosimga bardosh bera olmaydi, — deb yozdi futbolchi o‘z bayonotida.