Бразилиянинг «Сантос» клуби ҳужумчиси Неймар ўзининг ҳар бир ҳаракати учун жамоатчиликка изоҳ беришдан чарчаганини маълум қилди.
Бразилия А Сериясининг 12-тури доирасида «Сантос» ўз майдонида «Флуминенсе» жамоасини қабул қилиб, 2:3 ҳисобида имкониятни бой берди. Ушбу мағлубиятдан сўнг жамоа турнир жадвалида 15-ўринга тушиб кетди. Мазкур баҳсда 34 ёшли форвард тўлиқ ҳаракат қилган бўлса-да, самарали ҳаракатлари билан ажралиб тура олмади.
Ўйиндан сўнг футболчи ижтимоий тармоқлардаги саҳифасига видео жойлаштирди. Унда Неймар бармоқлари билан қулоқларини ёпиб, майдонни тарк этаётгани акс этган. Ушбу ҳолат жамоатчилик ва ОАВ вакиллари ўртасида турли баҳс-мунозараларга сабаб бўлди.
«Барселона» ва «ПСЖ» клубларининг собиқ аъзоси юзага келган вазиятга қуйидагича муносабат билдирди:
— Нима учун қулоғимни қашиганимга ҳам изоҳ беришим керак бўлган кунлар келди. Сизлар ҳаддингиздан ошиб, қизил чизиқни кесиб ўтмоқдасиз. Бундай ҳолатга дуч келиш жуда аянчли. Ҳеч бир инсон бундай босимга бардош бера олмайди, — деб ёзди футболчи ўз баёнотида.
