Yanvar oyida Teo Uolkott ehtiyotsizlik qilib Ueyn Runidan hozirgi «Arsenal» 2008 yilgi «Manchester Yunayted»ga qarshi qanday o‘ynagan bo‘lishi haqida so‘ragan edi. «Kanonirlar»ning sobiq a’zosi o‘sha so‘zlari uchun haligacha «haq to‘lamoqda».

Rio Ferdinand o‘zining yangi podkastida Patris Evradan bunday taqqoslash haqida nima deb o‘ylashini so‘radi. Fransiyalik sobiq himoyachi «Arsenal»ni ayab o‘tirmadi.

«Hozir o‘rnimdan turib, chiqib ketaman! Xa-xa! Yo‘q, Rio, tushunyapsanmi, «Arsenal»ning muammosi aynan shunda. Teo ushbu «Arsenal» jamoasini bizning 2008 yilgi tarkibimiz bilan solishtiryapti. U jamiyat uchun xavfli odam! Uni televizorga chiqarish mumkin emas. U bolalar uchun xavfli!

Shuning uchun aytamanki, «Arsenal»dagilar voqelikdan uzilib qolishgan. Bir necha yil oldin aytgan gapimni eslaysanmi: «Arsenal» o‘yinini tomosha qilish — xuddi Netflix ko‘rishga o‘xshaydi, chunki doim keyingi mavsumni kutishga majbursan.

Bilaman, hissiyot bilan gapiryapman, lekin ular haqiqatdan juda uzoqlashib ketishgan. Bunday taqqoslash — shunchaki hurmatsizlik. Bunday gaplardan keyin Uolkott hech qachon televizorda ko‘rinish bermasligi kerak, hech qachon!», dedi Evra.

APLning 33-turida «Manchester Siti» o‘z maydonida «Arsenal»ni mag‘lub etdi va birinchi o‘rin bilan oradagi farqni uch ochkogacha qisqartirdi. Shu bilan birga, «shaharliklar»da hali bitta zaxira o‘yini mavjud.