O‘zbekiston terma jamoasi va «Manchester Siti» himoyachisi Abduqodir Husanov CIES versiyasiga ko‘ra 23 yoshgacha bo‘lgan eng yaxshi futbolchilar ro‘yxatiga kiritildi.

Reyting so‘nggi olti oy davomidagi o‘yinlar asosida tuzilgan bo‘lib, unda futbolchilarning statistikasi, liga darajasi, jamoa natijalari hamda o‘yin vaqti hisobga olingan.

Husanovning APLdagi o‘rni

O‘zbekistonlik himoyachi Abduqodir Husanov Angliya Premyer-ligasida 79,9 indeks bilan 19-o‘rinni egalladi. Reytingda «Liverpul» yarim himoyachisi Florian Virts yetakchilik qildi. Ikkinchi o‘rinni «Manchester Siti» futbolchisi Rayan Sherki, uchinchi o‘rinni esa «Nyukasl Yunayted» vakili Lyuis Xoll egalladi.

Reyting qanday shakllantirildi

Xalqaro sport tadqiqotlari markazi — CIES Football Observatory 67 ta milliy ligada to‘p surayotgan 23 yoshgacha bo‘lgan futbolchilarni tahlil qildi. Bunda futbolchilarning sakkizta o‘yin ko‘rsatkich bo‘yicha natijalari, musobaqalar darajasi, jamoalar natijalari va maydonda o‘tkazgan vaqti inobatga olingan.

Umumiy reyting yetakchilari

Umumiy top-10 ro‘yxatidan «Barselona»ning to‘rt nafar futbolchisi joy oldi. Birinchi o‘rinni Lamin Yamal egalladi. Shuningdek, Pau Kubarsi — 5-o‘rin, Aleks Balde — 7-o‘rin, Fermin Lopes — 9-o‘rinda qayd etildi.

Pozisiyalar bo‘yicha yetakchilar

Tadqiqotda pozisiyalar kesimida ham eng yaxshilar aniqlandi:

Markaziy himoyachilar: Pau Kubarsi
Qanot himoyachilari: Varren Zair-Emeri
Markaziy yarim himoyachilar: Aleksandr Pavlovich
Hujumkor yarim himoyachilar: Kenan Yildiz
Vingerlar: Lamin Yamal
Markaziy hujumchilar: Vitor Roke

Shu tariqa, Abduqodir Husanov dunyo futbolidagi eng iqtidorli yosh himoyachilardan biri sifatida yana bir bor e’tirof etildi.