«Barselona» navbatdagi «Klasiko»da amerikalik xonanda Oliviya Rodrigoning logotipi tushirilgan maxsus formada maydonga tushadi. Bu haqda Mundo Deportivo nashri xabar bermoqda.
Kataloniya klubi hozirda ushbu reklama kampaniyasini ishga tushirishga faol tayyorgarlik ko‘rmoqda. «Barselona» va Spotify musiqiy servisi o‘rtasidagi hamkorlik doirasida ishlab chiqilgan ushbu forma taqdimoti uchun Oliviya Rodrigo maxsus fotosessiyada ishtirok etdi. Bundan tashqari, xonanda «Kamp Nou»da bo‘lib o‘tadigan «Real»ga qarshi uchrashuvga shaxsan tashrif buyurishi mumkin.
La Liganing 35-turi doirasidagi «Barselona» va «Real Madrid» o‘rtasidagi bahs 10 may kuni «Kamp Nou» stadionida bo‘lib o‘tadi.
