«Bavariya» darvozaboni Manuel Noyer mavsum yakunlanganidan keyin klubda qolish-qolmasligi borasida hali rasmiy bayonot bermadi. Myunxenliklarning 40 yoshli sardorining amaldagi shartnomasi shu yilning iyun oyi oxirida o‘z nihoyasiga yetadi.
Bundesliga grandi rahbariyati afsonaviy faxriy bilan kelishuvni yana bir yilga uzaytirish istagida. Jurnalist Florian Plettenbergning xabariga ko‘ra, Noyer o‘z kelajagi haqidagi savolga quyidagicha javob bergan:
«Men hozir hech narsani e’lon qilmoqchi emasman, lekin ayni damda hammasi ijobiy ko‘rinmoqda».
Eslatib o‘tamiz, chorshanba kuni darvozabon Vensan Kompani jamoasiga Germaniya Kubogi finaliga chiqishda yordam berdi. «Bayer»ga qarshi kechgan yarim final bahsida (2:0) Noyer o‘z darvozasi daxlsizligini saqlab qoldi. Manuel Noyer 2011 yildan buyon «Bavariya» sharafini himoya qilib kelmoqda.
