«Бавария» дарвозабони Мануэль Нойер мавсум якунланганидан кейин клубда қолиш-қолмаслиги борасида ҳали расмий баёнот бермади. Мюнхенликларнинг 40 ёшли сардорининг амалдаги шартномаси шу йилнинг июнь ойи охирида ўз ниҳоясига етади.

Бундеслига гранди раҳбарияти афсонавий фахрий билан келишувни яна бир йилга узайтириш истагида. Журналист Флориан Плеттенбергнинг хабарига кўра, Нойер ўз келажаги ҳақидаги саволга қуйидагича жавоб берган:

«Мен ҳозир ҳеч нарсани эълон қилмоқчи эмасман, лекин айни дамда ҳаммаси ижобий кўринмоқда».

Эслатиб ўтамиз, чоршанба куни дарвозабон Венсан Компани жамоасига Германия Кубоги финалига чиқишда ёрдам берди. «Байер»га қарши кечган ярим финал баҳсида (2:0) Нойер ўз дарвозаси дахлсизлигини сақлаб қолди. Мануэль Нойер 2011 йилдан буён «Бавария» шарафини ҳимоя қилиб келмоқда.