Мадриднинг "Атлетико" клуби ҳужумчиси Хулиан Альварес "Арсенал"га трансфер таклифи ортидан клуб раҳбарияти билан можарога боргани хабар қилинмоқда. Бу ҳақда Radio Gol маълум қилди.
Манба даъво қилишича, "Атлетико" бош директори Мигель Анхель Хиль Марин аргентиналик форварддан Англия клубига ўтишга рози бўлишни талаб қилган. Бунда футболчининг виза масалалари ва оиласини Буюк Британияга кўчириш билан боғлиқ қийинчиликлари ҳам инобатга олинмагани айтилмоқда.
Хабарга кўра, Хиль Марин Альварес трансферга рози бўлмаса, у ўйин амалиётидан маҳрум қилиниши мумкинлигини билдирган. Клуб раҳбарияти ҳатто бош мураббий Диего Симеоненинг қарорларига қарши чиқишга ва футболчини уй учрашувлари қайдномасига киритиб, уни мухлислар норозилигига дучор қилишга тайёр экани даъво қилинмоқда.
Материалда айтилишича, можаро вақтида Альварес кучли хавотир ҳолатини бошдан кечирган ва йиғлаб юборган. Раҳбарият билан тортишувдан сўнг футболчи клуб офисини тарк этган.
Альвареснинг атрофидагилар эса клуб томонидан психологик босим ўтказилаётганини асос қилиб, шартномани бекор қилиш масаласида ФИФАга мурожаат қилишни режалаштирмоқда.
