«Byornli» «Manchester Siti»dan uchralgan mag‘lubiyatdan so‘ng (0:1) Premyer-ligada jon saqlab qolish uchun mavjud bo‘lgan matematik imkoniyatlarini yo‘qotdi.

Uchrashuv taqdirini 5-daqiqada Erling Xoland tomonidan kiritilgan gol hal qildi. «Shaharliklar» turnir jadvalida peshqadamga aylanishdi, «Byornli» esa muddatidan oldin Chempionshipga ravona bo‘lishdi. Skott Parker jamoasi 19-o‘rinni egallab turibdi va mavsum tugashiga to‘rt tur qolganda, 17-o‘rinda borayotgan «Vest Xem»dan 13 ochkoga ortda qolmoqda.

Eslatib o‘tamiz, sal avvalroq so‘nggi pog‘onada borayotgan «Vulverxempton» ham yuqori divizionda qolish imkoniyatini yo‘qotgan edi. Endi mavsumning uchinchi «omadsiz» jamoasini aniqlash qoldi — ayni damda 18-o‘rinni «Tottenxem» egallab turibdi. Ularning quyi ligaga tushib ketishi APL tarixidagi eng shov-shuvli sensasiyalardan biri bo‘lishi mumkin.