Madridning «Real» klubi yarim himoyachisi Arda Gyulerning Angliyaga ehtimoliy transferi haqidagi gap-so‘zlar to‘xtamayapti. 21 yoshli futbolchiga «Arsenal» tomonidan bo‘layotgan qiziqish yana kun tartibiga chiqdi.

Jurnalist Sebastyen Vidalning xabariga ko‘ra, «kanonirlar» turkiyalik yosh yulduzni o‘z safiga qo‘shib olish ilinjida amaliy harakatlarga kirishishgan — futbolchining yaqinlari bilan aloqa o‘rnatib bo‘lingan. Shuningdek, «Liverpul» ham vaziyatni kuzatib bormoqda. Hozircha yarim himoyachining o‘zi «Real»dan ketish haqida o‘ylamayapti.

Ehtimoliy transfer qiymati 80 million yevrodan ko‘proqqa baholanmoqda. Arda Gyuler joriy mavsumda «qaymoqranglilar» libosida barcha turnirlarda 50 ta o‘yinda maydonga tushib, 6 ta gol urdi va 14 ta golli uzatmani amalga oshirdi.