Мадриднинг «Реал» клуби ярим ҳимоячиси Арда Гюлернинг Англияга эҳтимолий трансфери ҳақидаги гап-сўзлар тўхтамаяпти. 21 ёшли футболчига «Арсенал» томонидан бўлаётган қизиқиш яна кун тартибига чиқди.

Журналист Себастьен Видалнинг хабарига кўра, «канонирлар» туркиялик ёш юлдузни ўз сафига қўшиб олиш илинжида амалий ҳаракатларга киришишган — футболчининг яқинлари билан алоқа ўрнатиб бўлинган. Шунингдек, «Ливерпуль» ҳам вазиятни кузатиб бормоқда. Ҳозирча ярим ҳимоячининг ўзи «Реал»дан кетиш ҳақида ўйламаяпти.

Эҳтимолий трансфер қиймати 80 миллион евродан кўпроққа баҳоланмоқда. Арда Гюлер жорий мавсумда «қаймоқранглилар» либосида барча турнирларда 50 та ўйинда майдонга тушиб, 6 та гол урди ва 14 та голли узатмани амалга оширди.