Italiyalik mutaxassis Klaudio Ranyeri «Roma» maslahatchisi lavozimini tark etdi. Bu haqda klub matbuot xizmati xabar bermoqda.
Avvalroq, 74 yoshli Ranyeri jamoa bosh murabbiyi Jan Pyero Gasperini bilan yuzaga kelgan kelishmovchilik sababli «Roma»dan ketishi haqida ma’lumotlar tarqalgan edi.
«Klub Klaudioga «Roma» rivojiga qo‘shgan salmoqli hissasi uchun minnatdorchilik bildiradi. U jamoani juda qiyin davrda boshqargan va biz uning sa’y-harakatlaridan doimo minnatdormiz», — deyiladi rimliklar bayonotida.
Ta’kidlanishicha, «Roma» rahbariyati Gasperiniga to‘liq ishonadi va u bilan hamkorlikni davom ettiradi. Italiya chempionatining 33-turidan so‘ng «Roma» 58 ochko jamg‘argan holda turnir jadvalida oltinchi o‘rinni egallab turibdi.
