Италиялик мутахассис Клаудио Раньери «Рома» маслаҳатчиси лавозимини тарк этди. Бу ҳақда клуб матбуот хизмати хабар бермоқда.
Аввалроқ, 74 ёшли Раньери жамоа бош мураббийи Жан Пьеро Гасперини билан юзага келган келишмовчилик сабабли «Рома»дан кетиши ҳақида маълумотлар тарқалган эди.
«Клуб Клаудиога «Рома» ривожига қўшган салмоқли ҳиссаси учун миннатдорчилик билдиради. У жамоани жуда қийин даврда бошқарган ва биз унинг саъй-ҳаракатларидан доимо миннатдормиз», — дейилади римликлар баёнотида.
Таъкидланишича, «Рома» раҳбарияти Гасперинига тўлиқ ишонади ва у билан ҳамкорликни давом эттиради. Италия чемпионатининг 33-туридан сўнг «Рома» 58 очко жамғарган ҳолда турнир жадвалида олтинчи ўринни эгаллаб турибди.
