Londonning «Arsenal» klubi Angliya Premyer-ligasida burchak zarbalaridan gol urish bo‘yicha tarixiy natijani qayd etdi.

APLning 34-turi doirasida kechayotgan «Nyukasl»ga qarshi bahsning 9-daqiqasida Eberechi Eze jarima maydoni tashqarisidan raqib darvozasini ishg‘ol qilib, hisobni ochdi. Ushbu gol burchak zarbasi o‘yinga kiritilgandan so‘ng yuzaga keldi.

Shu tariqa, «kanonirlar» joriy mavsumda burchak to‘plaridan urilgan gollari sonini 17 taga yetkazib olishdi. Bu turnir tarixidagi eng yuqori ko‘rsatkichdir. Bungacha rekord «Arsenal»ning o‘ziga (2023/24 yilgi mavsumda 16 ta gol), shuningdek, «Oldhem» (1992/93) va «Vest Bromvich» (2016/17) klublariga tegishli edi.