«Manchester Siti» bosh murabbiyi Xosep Gvardiola jamoaning ushbu mavsumda uchta ichki sovrinni qo‘lga kiritish imkoniyati haqida hozircha o‘ylamayotganini aytdi. Murabbiy Angliya Kubogi yarim finalida «Sautgempton» ustidan qozonilgan 2:1 hisobidagi g‘alabadan so‘ng jurnalistlarning savoliga javob berdi.
«Treblmi? Bungacha hali juda uzoq. Faqat chempionatning so‘nggi o‘yini — “Aston Villa”ga qarshi bahs oldidan imkoniyat bor-yo‘qligini aytamiz. Hozircha bu haqda gapirishga erta. Eng muhimi, barcha futbolchilar uch kun dam olishi kerak. Men ularga futbol haqida o‘ylamaslikni va faqat dam olishni aytdim. Mavsum davom etadi — oldimizda beshta o‘yin va Angliya kubogi finali bor. Aytardimki, Premyer-liga deyarli qo‘ldan chiqdi, biz yana ikkinchi o‘rindamiz — endi barchasi qanday tugashini ko‘ramiz», — dedi Gvardiola BBC nashriga.
Eslatib o‘tamiz, avvalroq «shaharliklar» Angliya Liga kubogini qo‘lga kiritgan edi. Finalda «Arsenal» 2:0 hisobida mag‘lub etilgan. Hozirda «Manchester Siti» APL chempionligi uchun ham «Arsenal» bilan kurash olib bormoqda. Gvardiola shogirdlari 33 ta o‘yindan keyin 70 ochko bilan ikkinchi o‘rinda bormoqda, «kanonirlar» esa 34 ta uchrashuvdan keyin 73 ochko jamg‘argan.













