Ispaniya matbuotida Kilian Mbappe atrofida navbatdagi shov-shuvli xabarlar paydo bo‘ldi. Ayrim manbalar futbolchining so‘nggi jarohatini “Real Madrid”dan vaqtincha uzoqlashish sifatida baholamoqda. Bu haqda Goal nashri xabar berdi.

2029 yilgacha amal qiluvchi shartnomaga ega hujumchi “Betis”ga qarshi uchrashuvda tizzasidagi og‘riq sabab o‘yin tugashiga 10 daqiqa qolganda maydonni tark etgan. Uning almashtirilishidan so‘ng madridliklar gol o‘tkazib yuborib, durang qayd etdi va bu natija chempionlik poygasidagi imkoniyatlarni deyarli nolga tushirdi. O‘yinda Ektor Belerin tomonidan kiritilgan gol oldidan Ferlan Mendiga nisbatan qo‘pollik bo‘lgani muhokama qilinmoqda. Mazkur epizod bosh murabbiy Alvaro Arbeloaning noroziligiga sabab bo‘lgan, Antonio Ryudigerning xatosi esa vaziyatni yanada murakkablashtirgan.

Uchrashuvdan keyin muxlislar norozi kayfiyatini yashirmadi. Qayd etilishicha, muxlislar Mbappening jarohat sabab maydonni tark etganiga shubha bilan qarashgan va uning o‘yinga to‘liq tayyor emasligini ta’kidlashgan.

Marca nashri esa vaziyatni yanada keskin talqin qilib, birinchi sahifada “Mbappening sabr-kosasi to‘ldi” sarlavhasini chiqardi. Manbaga ko‘ra, bunga JCH oldidan takrorlanayotgan jarohatlar hamda kiyinish xonasidagi noaniq vaziyatlar sabab bo‘lmoqda. Shuningdek, futbolchining jamoadoshlari bilan munosabatlari yomonlashayotgani haqidagi xabarlar ham tilga olinmoqda.

Ichki muhitga doir ma’lumotlarda Mbappening Jud Bellingem bilan bir necha bor kelishmovchilikka borgani, shuningdek, uning bosh murabbiy Alvaro Arbeloaga nisbatan munosabati ham ijobiy emasligi aytiladi. Bundan tashqari, futbolchi klubda Vinisius Juniorga ko‘proq ustunlik berilayotganidan norozi ekani ta’kidlanmoqda.

Hozirda Vinisius amaldagi shartnomasini uzaytirishga yaqin. Avvalroq muzokaralar maosh masalasi va murabbiylar bilan bog‘liq kelishmovchiliklar tufayli to‘xtab qolayotgan edi. So‘nggi ma’lumotlarga qaraganda, braziliyalik futbolchi eng yuqori maosh talabi bo‘yicha pozisiyasini yumshatib, bu borada yetakchilikni Mbappega qoldirishga tayyor.

Mavsum yakunlari ham klub ichidagi vaziyatga ta’sir ko‘rsatishi mumkin. Agar Alvaro Arbeloa jamoani sovrinsiz yakunlasa, uning iste’fosi ehtimoli yuqori. Bu esa Mbappe uchun ijobiy o‘zgarish sifatida ko‘rilmoqda.

Murabbiylikka ehtimoliy nomzodlar qatorida Didye Desham tilga olinmoqda. U va Mbappe o‘rtasida Fransiya terma jamoasidagi hamkorlikdan shakllangan ijobiy munosabatlar mavjud.