Londonning “Arsenal” klubi bosh murabbiyi Mikel Arteta “Nyukasl” ustidan qozonilgan g‘alabadan (1:0) so‘ng, hakamlarning qarorlariga nisbatan keskin norozilik bildirdi. Mutaxassis o‘tgan turda “Manchester Siti”ga boy berilgan o‘yinni (1:2) yodga olib, Abduqodir Husanov bilan bog‘liq vaziyatni chempionlik poygasidagi burilish nuqtasi deb atadi.

Artetaning so‘zlariga ko‘ra, uchrashuvning 53-daqiqasida, hisob 1:1 bo‘lib turgan pallada o‘zbekistonlik himoyachi Kai Haversga nisbatan “so‘nggi chora folini” ishlatgan.

“Husanov Haversni yiqitdi, hisob 1:1, chempionlik masalasi hal qilinayotgan edi. Husanovga aniq qizil kartochka ko‘rsatilishi lozim edi. Agar o‘shanda "Siti" 10 kishi bo‘lib qolganida, hozir barchasi boshqacha bo‘lardi. Men buni yutqazganimizda aytmagan edim, mana hozir yutganimizda gapiryapman”, dedi Arteta.

Ma’lumot uchun, Angliya Premyer Ligasining 34-turidan keyin “Arsenal” 73 ochko bilan 1-o‘rinni egallab turibdi. “Manchester Siti” esa 70 ochko bilan 2-pog‘onani band etgan. Ammo shuni ham ta’kidlash kerakki, Pep Gvardiola jamoasi hisobida bitta zaxira o‘yini mavjud. Agar “Siti” ushbu bahsda yirik hisobda g‘alaba qozonsa, turnir jadvalida birinchi o‘ringa chiqib oladi.