Лондоннинг “Арсенал” клуби бош мураббийи Микель Артета “Ньюкасл” устидан қозонилган ғалабадан (1:0) сўнг, ҳакамларнинг қарорларига нисбатан кескин норозилик билдирди. Мутахассис ўтган турда “Манчестер Сити”га бой берилган ўйинни (1:2) ёдга олиб, Абдуқодир Ҳусанов билан боғлиқ вазиятни чемпионлик пойгасидаги бурилиш нуқтаси деб атади.

Артетанинг сўзларига кўра, учрашувнинг 53-дақиқасида, ҳисоб 1:1 бўлиб турган паллада ўзбекистонлик ҳимоячи Каи Ҳаверцга нисбатан “сўнгги чора фолини” ишлатган.

“Ҳусанов Ҳаверцни йиқитди, ҳисоб 1:1, чемпионлик масаласи ҳал қилинаётган эди. Ҳусановга аниқ қизил карточка кўрсатилиши лозим эди. Агар ўшанда "Сити" 10 киши бўлиб қолганида, ҳозир барчаси бошқача бўларди. Мен буни ютқазганимизда айтмаган эдим, мана ҳозир ютганимизда гапиряпман”, деди Артета.

Маълумот учун, Англия Премьер Лигасининг 34-туридан кейин “Арсенал” 73 очко билан 1-ўринни эгаллаб турибди. “Манчестер Сити” эса 70 очко билан 2-поғонани банд этган. Аммо шуни ҳам таъкидлаш керакки, Пеп Гвардиола жамоаси ҳисобида битта захира ўйини мавжуд. Агар “Сити” ушбу баҳсда йирик ҳисобда ғалаба қозонса, турнир жадвалида биринчи ўринга чиқиб олади.