O‘zbekiston Superligasi 10-turidan o‘rin olgan uchrashuvda «Buxoro» safarda «Mash’al» mehmoni bo‘lib, minimal hisobda g‘alaba qozondi.

Birinchi bo‘limda har ikki jamoa ham ehtiyotkor o‘yin namoyish etdi. 17-daqiqada Shahzod Ubaydullayevning zarbasini darvozabon qaytardi. Keyinroq Vladimir Rodich va Nika Kachavara ham yaxshi imkoniyatlarga ega bo‘lishdi, ammo hisob ochilmadi.

42-daqiqada Kachavaraning bosh bilan yo‘llagan xavfli zarbasini ham mezbonlar posboni bartaraf etdi. Shu tariqa birinchi bo‘lim 0:0 hisobida yakunlandi.

Ikkinchi bo‘limda ham «Buxoro» faolroq harakat qildi. 51-daqiqada Umidjon Hamroyev jamoasini muqarrar goldan qutqarib qoldi. 66-daqiqada esa «Mash’al» futbolchisi Rashid Abubakar qizil kartochka olib, maydonni tark etdi.

Biroq oradan ko‘p o‘tmay mehmonlar ham bir futbolchisidan ayrildi. 75-daqiqada ogohlantirilgan Asadbek Jo‘raboyev 76-daqiqada qizil kartochka olib, maydondan chetlatildi.

Uchrashuv taqdirini 86-daqiqa hal qildi. Zaxiradan maydonga tushgan Sherzod Esanov aniq zarba bilan hisobni ochdi va jamoasiga muhim uch ochko keltirdi — 0:1.

Qo‘shimcha daqiqalarda ham «Buxoro» ustunlikni saqlab qoldi va final hushtagi mehmonlar g‘alabasini qayd etdi.

Ushbu g‘alabadan keyin "Buxoro" o‘z ochkolarini 17 taga yetkazib, jadvalda 4-o‘ringa ko‘tarilib oldi. "Mash’al" esa joriy mavsumda hali ochkoni qo‘lga kiritmadi: 10 o‘yin va 10 mag‘lubiyat.

O‘zbekiston Superligasi, 10-tur
27 aprel 2026 yil
«Mash’al» — «Buxoro» 0:1
Gol: Sherzod Esanov, 86 (0:1).
Chetlatishlar: Rashid Abubakar, 66 («Mash’al»), Asadbek Jo‘raboyev, 76 («Buxoro»).