Ўзбекистон Суперлигаси 10-туридан ўрин олган учрашувда «Бухоро» сафарда «Машъал» меҳмони бўлиб, минимал ҳисобда ғалаба қозонди.

Биринчи бўлимда ҳар икки жамоа ҳам эҳтиёткор ўйин намойиш этди. 17-дақиқада Шаҳзод Убайдуллаевнинг зарбасини дарвозабон қайтарди. Кейинроқ Владимир Родич ва Ника Качавара ҳам яхши имкониятларга эга бўлишди, аммо ҳисоб очилмади.

42-дақиқада Качаваранинг бош билан йўллаган хавфли зарбасини ҳам мезбонлар посбони бартараф этди. Шу тариқа биринчи бўлим 0:0 ҳисобида якунланди.

Иккинчи бўлимда ҳам «Бухоро» фаолроқ ҳаракат қилди. 51-дақиқада Умиджон Ҳамроев жамоасини муқаррар голдан қутқариб қолди. 66-дақиқада эса «Машъал» футболчиси Рашид Абубакар қизил карточка олиб, майдонни тарк этди.

Бироқ орадан кўп ўтмай меҳмонлар ҳам бир футболчисидан айрилди. 75-дақиқада огоҳлантирилган Асадбек Жўрабоев 76-дақиқада қизил карточка олиб, майдондан четлатилди.

Учрашув тақдирини 86-дақиқа ҳал қилди. Захирадан майдонга тушган Шерзод Эсанов аниқ зарба билан ҳисобни очди ва жамоасига муҳим уч очко келтирди — 0:1.

Қўшимча дақиқаларда ҳам «Бухоро» устунликни сақлаб қолди ва финал ҳуштаги меҳмонлар ғалабасини қайд этди.

Ушбу ғалабадан кейин "Бухоро" ўз очколарини 17 тага етказиб, жадвалда 4-ўринга кўтарилиб олди. "Машъал" эса жорий мавсумда ҳали очкони қўлга киритмади: 10 ўйин ва 10 мағлубият.

Ўзбекистон Суперлигаси, 10-тур
27 апрель 2026 йил
«Машъал» — «Бухоро» 0:1
Гол: Шерзод Эсанов, 86 (0:1).
Четлатишлар: Рашид Абубакар, 66 («Машъал»), Асадбек Жўрабоев, 76 («Бухоро»).