Turinning «Yuventus» klubi «Shtutgart» yarim himoyachisi Angelo Shtillerni o‘z safiga qo‘shib olmoqchi. Bu haqda Tuttomercatoweb nashri xabar bermoqda.

Manba bergan ma’lumotlarga ko‘ra, Italiya klubi vakillari 25 yoshli Germaniya terma jamoasi a’zosining agentlari bilan allaqachon bog‘lanishgan va futbolchining ayni damdagi holati bo‘yicha ma’lumot to‘plashgan. Qizig‘i shundaki, 2025 yilda afsonaviy Toni Kroos Shtillerni «Real Madrid»ga tavsiya qilgan edi. Hozirda Kroosning yaqin atrofidagi insonlar Angeloning manfaatlarini himoya qilmoqda, bu esa transfer taqdirida muhim rol o‘ynashi mumkin.

Eslatib o‘tamiz, o‘tgan yozda Xabi Alonso Shtillerni o‘z jamoasiga olib kelish imkoniyatidan voz kechgan edi. Futbolchining «Shtutgart» bilan shartnomasida 36 million yevro miqdoridagi tovon puli ko‘rsatilgan. Joriy mavsumda Angelo 48 ta o‘yinda maydonga tushib, 2 ta gol va 10 ta golli uzatmaga mualliflik qildi. Transfermarkt uning transfer qiymatini 45 million yevroga baholamoqda.