«Trabzonspor» darvozaboni Andre Onana «Manchester Yunayted»da yangi imkoniyatga ega bo‘lishdan umidvor. Daily Mail Sport nashrining xabar berishicha, ijara muddati yakunlangach, Onana «Manchester Yunayted»ga qaytishni istamoqda.
30 yoshli kamerunlik posbon «qizil iblislar»ning asosiy tarkibidagi o‘rin uchun Senne Lammens bilan kurashishga qat’iy qaror qilgan.
«Trabzonspor» Onanani o‘tgan yilning sentyabr oyida ijaraga olgan edi. O‘shandan beri darvozabon 29 ta o‘yinda maydonga tushib, 37 ta gol o‘tkazib yubordi va 6 ta uchrashuvda o‘z darvozasi daxlsizligini saqlab qoldi.
Eslatib o‘tamiz, 2023 yilda «Manchester Yunayted» Onanani «Inter»dan 50 million yevro evaziga sotib olgan edi. Darvozabonning klub bilan shartnomasi 2028 yilgacha mo‘ljallangan.
