«Bavariya» bosh murabbiyi Vensan Kompani diskvalifikasiya sababli o‘z jamoasining zaxira o‘rindig‘ida bo‘la olmadi. Belgiyalik mutaxassis sariq kartochkalari ko‘payib ketgani uchun Chempionlar Ligasi yarim finalining «PSJ»ga qarshi dastlabki o‘yinidan chetlatilgan edi. Murabbiy voqealar rivojini tribunadan kuzatib bordi.
Uchrashuv myunxenliklarning 4:5 hisobidagi mag‘lubiyati bilan yakunlandi.
«O‘yinni tribunadan tomosha qilish menga yoqmadi. Men Luis Enrikega (ba’zida tribunada o‘tirishni afzal ko‘rishiga ishora qilib) nega u buni o‘z xohishi bilan qilishini tushunmasligimni aytdim. Ammo jamoam xarakter ko‘rsatgani menga manzur bo‘ldi. Bu futbolni sevadiganlar uchun haqiqiy o‘yin bo‘ldi», — dedi Kompani jurnalistlar bilan suhbatda.
Javob uchrashuvi kelasi chorshanba kuni «Alyans Arena»da bo‘lib o‘tadi.
