Saudiya Arabistoni chempionatining 30-turi doirasida «An-Nasr» klubi o‘z maydonida «Al-Ahli»ni qabul qildi va 2:0 hisobida g‘alaba qozondi. Ushbu muvaffaqiyat Ar-Riyod klubi uchun nafaqat muhim uch ochko, balki tarixiy rekordni ham taqdim etdi.
Jorje Jezush shogirdlari ichki birinchilikda ketma-ket 16-g‘alabasini rasmiylashtirishdi. Jamoaning ushbu zafarli seriyasi joriy yilning 17 yanvaridan buyon davom etib kelmoqda. Bu ko‘rsatkich «An-Nasr» klubi tarixidagi eng uzoq davom etgan g‘alabali seriya sifatida rekord sifatida qayd etildi.
Ayni damda Krishtianu Ronaldu to‘p surayotgan jamoa turnir jadvalida birinchi o‘rinni egallab turibdi. Ular eng yaqin ta’qibchisi «Al-Hilol»ni 8 ochkoga ortda qoldirmoqda. Biroq, ta’qibchi jamoa hisobida bitta zaxira o‘yini mavjudligini inobatga olsak, chempionlik uchun kurash hali oldinda.
