Shanba kuni A Seriyaning 35-turi doirasida «Komo» o‘z maydonida «Napoli»ni qabul qiladi. Uchrashuv oldidan «byankoblu» bosh murabbiyi Sesk Fabregas neapolliklar ustozi Antonio Konte haqida o‘z fikrlarini bildirib o‘tdi. Eslatib o‘tamiz, Fabregas «Chelsi»da aynan Konte qo‘l ostida to‘p surgan.
«Men Antoniodan ko‘p narsa o‘rganganman. Uning qo‘l ostida jismoniy jihatdan juda ko‘p "aziyat chekishga" to‘g‘ri kelardi — u maksimal darajadagi intensivlikni talab qilardi. Hech kim meni u kabi qiynamagan. Hozirda men ham o‘z jamoamdan xuddi shuni talab qilyapman — balki biroz boshqacharoq ko‘rinishdadir, lekin tamoyillar o‘sha-o‘sha. Konte davridagi jismoniy tayyorgarlik tufayli men dekabr oyiga kelib o‘zimni a’lo darajada his qilardim. Ko‘nikish va moslashish uchun vaqt kerak bo‘lgan, ammo men uning g‘oyalariga chin dildan ishonardim», — dedi ispaniyalik mutaxassis matbuot anjumanida.
«Komo» — «Napoli» uchrashuvi Toshkent vaqti bilan soat 21:00 da start oladi.
